News Desk

مَلکناز و بلۆچئے برمش

بازێن زهرشانیێا رند تُربت پولیسا ملکناز ئے کُشۆک و برمشئے ٹَپّی کنۆکێن دُزّانی سرۆک سمیر سبزل دزگیر کُرت۔ اے شَرّێن گامگێجے۔ بله اے هبر چارگی اِنت که بارێن اے مرد سِزا دئیگَ بیت اگن نه پرچا که اے وڑێن دروَر باز اِنت که ھر ھما مردم که آییا پاکستانئے اِجنسیانی دست سرا بوتگ، آ په  پێش دارگا گِرگ وه بوتگ بله سِزاھا نَشُتگ۔ تُرس ھمێش اِنت که اے بری، سمیر سبزلئے گۆما ھم انُچشَ بیت۔

رسانکدرا اے ھال ھم شِنگ اِنت که پولیسا سبزل که گپتگ، ملکنازئے کێسی آییئے سَرا نلَڈّتگ، سمیر پولیسئے کرّا گوستگێن سالئے کێسێا گِرگ بوتگ و بند اِنت۔ باید اِنت تُربت پولیس جئواب بِدنت که اگن آییئے هلاپا گوستگێن سالا رپۆرٹے بوتگ، گُڑا اینچک وھدا پرچا دزگیر کنگ نبوتگ۔ سمیر سبزل جنگلا چێر نبوتگ، تُربتئے دمگ آپسرا وتی لۆگا نندۆک بوتگ و وتی ٹۆلیا، مردمانی لۆگا په دُزّیا دێم دئیگا بوتگ۔

تُربتئے ڈی پی او ستَر گَپّا تاب بدنت بله ھندئے مردم زاننت که سمیر سبزلئے دست دور سَکّ اَنت، پمێشا اُمێت کم اِنت که برمشئے کێس شَرّ پۆلَگ ببیت و ملکنازئے کُشۆک سزا دئیگ ببنت۔  پاکستانئے اجنسی زاننت که اگن یک سمیر سبزلے جێلا برئوت، گڑا بلۆچستانئے دراهێن دُزّانی ٹۆلیانی دِلَ کپیت۔

چۆناھا ھم ایۆک یک دُزّێئے دزگیری جیڑهئے گیشوار نه اِنت۔ اے زهرشانی اَسلا دراهین ڈیتھ اسکواڈانی وَلگوَج کنگئے واستا بئیگا اَنت۔ هر مێتگا اے دُزّانی ٹۆلی هَست اَنت۔ پئوج اِشان شَپُکی ھم پرماییت، سیاسی و انسانی هکئے کارندهانی چِست کنگ پرماییت، پاکستان زندگ بات پرماییت۔ اے پئوجئے زرورت اَنت۔

گوستگیں کِساس ده سال اِنت بلۆچستانا مهلوک ڈنَا سَک کَم در آتکگ۔ شالا انگت برے برے مُچی بوتگ بله مَکُران و اے دگه دمگان چَٹ هامۆشی بوتگ۔ چئیرمین غُلام محمد و پروفیسر صبا دشتیاریئے کۆشا پَد بلۆچستان سیاسی کارندهئے بدلا ھمے ڈیتھ اسکواڈان گۆن بوتگ۔

اے ٹۆلیانی گیشتر سرۆک ڈُنگ اَنت۔ اے شپئے شپ آورتگ و سیاسی سرۆک جۆڑ کُرتگ اَنت، په اۆٹ‌دُزّی پارلیمنٹا ھم سر کُرتگ اَنت، هر یکێا دو دو درزن گاٹ گۆن سی تیریان داتگ.

اشانا، هر یکێا هرچی کنگئے اجازت اِنت. بس شونزێن جَنڈی و زَردێن وردیا رَزا کن، دگه گۆن هرکسا، هرچی تئیی دل لۆٹیت، بکن. بلۆچستانا، انسانی هکانی گَلێئے گوَشگ اِنت که کُشگ و بێگواهیئے گێشتر کێسانی تها چست کنۆک و کشۆک همے ڈیتھ اسکواڈ اَنت و اے وزیرانی سرۆکیا کارَ کننت. آ گوَشنت که سجهێن بلۆچستان همے سله بندانی دستا اِنت.

بلۆچستانا هر رۆچ اے مردمانی دستا هزاران مردم لگتمال اِنت. کَس نزانت کدی، کئے منی لۆگا دئورَ کنت، منی جندا گۆن لۆگئے سجهێن مردمان بارت یا کُشیت. همے سئوب اِنت که برمشئے جێڑهئے سرا بلۆچستانئے دراهێن دمگان بگر تان کراچیا بلۆچ پاد آتکنت چیا که اے ڈیتھ اسکواڈان سجهێن جاگهان مهلوک دلسیاه کرتگ.

سمیرئے سرا کجام کێس جنگ بوتگ، اے گپ انگه زانگَ نبیت. سمیرا سزا دئیَنت یا په کسانێن وهدێا سرکاری لۆگێا نادێننت و پدا دگه جاگهے برنت و نادێننت، اے گپ هم زانگَ نبیت. بله اے گپ الّم اِنت که تانکه اے ڈیتھ اسکواڈ هست اَنت، هر رۆچ ملکناز کُشَگَ بنت، هر رۆچ برَمش ٹَپّی بنت. اے ملکناز و برمش هَرکسی لۆگئے بوتَ کننت.

Don’t miss posts from Balochistan Times!

We don’t spam!

+ posts

Leave a Comment