Dr Naguman

گْوادِرءُ چادِر

بلوچیءَ چُشیں نام باز اِنت کہ دَرکومانی دپءَ نیاینت۔ اے وڑیں نامانی تہا یکے “گْوادِر” اِنت کہ آ “گَ وا دَر” ئےِ کننت۔

گْوادِرءِ راستیں گالتَوار چَرے زَھِیریگ / گیدی سوتءَ پَدّر اِنت

کسّے نہ روت اِں گْوادِرءَ
زَھیرانی بنداں چادِرءَ

اگاں دَرکومے گْوادِرءَ گَوادَر ءُ مَکُّرانءَ “مِکران” کنت، مَیاریگ نہ اِنت۔ بِگندئے آھیءِ زبان ءِ توارینکی رھبند ھَنچ اِنت کہ بلوچی نام آھیءِ دپءَ نیاینت۔ بلے اگاں وتی مَنّاں وانندگیں بلوچے بلوچی ناماں دَرکومانی رَنگءَ بہ گشیت گُڑا اے نادْراھی یے کہ تَبزانتی زبانءَ اِشیءَ “کمتری ءِ مارشت” [وتا چہ دگراں کمتر لیکگ] گشنت۔ کمتریءِ نادْراھیءِ گْورجتگیں مردمءِ نِزّءَ بلوچی لَبزانی راستیں گالتوار ھما اِنت کہ دَرکومءِ دپءَ در کیت۔

راجے کہ گُلام بیت، آھیءِ مردم کمتریءِ مارشتءِ آماچ بنت، چہ وتی راجدپترءُ زبانءَ سِدنت، وتی راجی کیلواں یلہ کننتءُ وتا ھاکِمیں راجءِ رنگءَ رَجنت۔ اے دْرہ راجی گُلامیءِ سَٹّ اَنت کہ بلوچءَ بلوچی زبان یلہ داتگءُ اُردوءِ رَندءَ کپتگ ءُ گْوادِرءَ گَوادَر کنت۔

بَژنی گپے کہ گُلام تَبءَ گْوادِر وَ گار کتگ بلے آھیءِ زھیرئےِ چادرءِ لَمبءَ بَستگ اَنت نہ نام۔

 

Gwádir o Cádir

Balócíá cuśéń nám báz int ki darkomání dapá nyáyant. É waŕéń námání tahá yakké “Gwádir” int ki á “Gawádar”,é kanant. Gwádir e rástéń gáltawár caré zahíríg / gédí sotá paddar int:

Kassé na rot iń Gwádirá
(mań) zahírání bandáń cádirá

Agáń darkomé Gwádirá Gawádar o Makkuráná “Mekrán” kant, mayáríg na int. Biginde áhíe zubán e tawárénkí rahband hanc int ki Balócí nám áhíe dapá nyáyant. Bale agáń watí mannáń wánindagéń Balócé Balócí námáń darkomání rangá buguśít guŕá é nádráhíé ki tabzántí zubáná iśíá kamtirí e máriśt (watá ca digiráń kamtir lékag = inferiority complex) guśant. Kamtirí e nádráhí e gwar jatagéń mardum e nizzá Balócí labzání rástéń gáltawár hamá int ki darkom e dapá dar ket.

Rájé ki gulám bít, áhíe mardum kamtirí e máriśt e ámác bant, ca watí rájdaptar o zubáná sidant, watí rájí keloáń yala kanant o watá hákiméń ráj e rangá rajant. É druh rájí gulámí e saŧŧ ant ki Balócá Balócí zubán yala dátag o Urdú e randá kaptag o Gwádirá Gawádar kant.

Baźní gappé ki gulámtabá Gwádir wa gár kutag bale áhíe zahír,é cádir e lambá bastagant na nám.

Don’t miss posts from Balochistan Times!

We don’t spam!

+ posts

Naguman, a medical doctor by profession, is a Balochi fiction writer and literary critic. He also often comments on political and social issues of Balochistan.

1 thought on “گْوادِرءُ چادِر”

  1. جی ہهو انچوش اِنت ، لہتیں بلوچ وتی زبان ءَ ہم گَپ جنگ لج کن اَنت ءُ چو نہ زان اَنت کہ بلوچی ءُ بلوچیات آهانی پجار زانگ بیت، ءُ منت وار ءَ تی کہ تو من ءَ بلوچی زبان دو لفظ ءِ آواز بزانت ءِ بابت ءَ چیزیں گُشت…..

    Reply

Leave a Comment