بلۆچ کماش حمیدالله سردارزئیی چه کرۆنائے نادراهیا بێران بوت

 نامدارێن بلۆچ کماش واجه سردار حمیدالله سردارزئیی، دۆشی، یکشمبها، تهرانا، چه کرۆنائے نادراهیا بێران بوتگ. واجه سک نادراه بوتگ و تهرانئے هسپتالا آیی سی یوا بوتگ. واجه حمیدالله سردارزئیانی کماش بوتگ. آییئے اُمر شَست سال بوتگ.

واجه سکێن بااسرێن مردمے بوتگ و سجهێن بلۆچان، هاس چهبارئے مردمان پتێئے چمان چارتگ. مردم آییا مهروان و زانتکارێن مردمێئے هسابا یاتَ کننت. واجها بلۆچی زبان و لبزانکئے هم سک باز هُب و واهگ بوتگ.

نامیێن بُتکار حسن یادگارزادها انسٹاگراما پۆسٹے داتگ، سیاهێن اکسے جتگ و نبشتهی کرتگ که: ”ما نون تهنا بوتێن“.

سویڈنا جهمنندێن بلۆچ تامُرکار همایون مبارکیا وتی پۆسٹێئے تها گوشتگ که: ”سَکێن مزنێن ستونے چه مئے شمئے جامها دور کنگ بوت“.

رَپتگێن کماشئے نام و تئوار رۆدراتکی بلۆچستانا هم پرُشتگ. ثَناء بلۆچا ٹویٹێئے تها گوشتگ که: ”په بلۆچان سکێن مزنێن تاوانے. (حمیدالله) کماشێن سرۆک و اێرانئے تها شرپمندێن بلۆچے اَت“.

حمیدالله سردارزئیی چۆناها کسرکَند، اێرانا ودی بوتگ، بله آییا بازێن وهدے کراچیا گوازێنتگ، چیا که آییئے لۆگئے مردم چه اێرانا دَرانڈێه بوتگ و پاکستانا نندۆک بوتگ‌اَنت. آییئے پت میر مئولَدادا، ایرانی انکلاب و اسلامی رجیمئے هلاپا بلۆچانی 1979 ئے آشۆبا رند ایرانا نِشت نکرت و لَڈِّت.

واجه سردارزئییا کراچیا ونتگ و چه کراچی یونیورسٹیا پولیٹێکل ساینسا ماسٹرز کرتگ. آییئے پت که کراچیا کُشگ بوت و ایرانا جار جت که سجهێن جلاوتنێن بلۆچێن کبێله بکشَک بوتگ‌اَنت، ته واجه حمیدالله واتر بوت و ایرانا شُت.

چه ایرانئے انکلابا رند بلۆچ سرداران آ پێسری زۆر و تاکت وَه نێست‌اِنت که ایرانا سرداری نزام هلاس کرتگ، بله اِلاکهانی بلۆچ انگت آیان اِزّتَ دئینت و مردم په وتی جێڑهانی گیشّێنگا انگه همے سردارانی گوَرا رئونت.

سردار حمیدالله باندا، سئے شمبِها، ڈِسٹرِکٹ چهبارا گُلزمینئے اَمبازان واپێنَگَ بیت.